Alaitz-Idoia eta Salegi-Lozano, txapeldun!
Aurreko igandean bukatu zen Pala Txapelketa, finalak eta 3-4 postuen lehiarako partiduak jokatuta. Irabazi edo galdu, ondo ospatu zuten guztiek Kontsejun, bazkari eder baten bueltan. Santio jaietan denek daukate gozatzeko eta ondo pasatzeko tartea, eta halaxe egin dute Aranoko Pala Txapelketan ere.
Ba Alaitzek eta Idoiak jantzi zuten txapela, nesketan, 22-15 irabazita Maitane eta Naroari. Eta mutilen txapelketan, berriz, Salegi eta Lozano izan dira onenak, finalean Loidi eta Amasen kontra nagusituta 22-14.
Hirugarren posturako, oso partidu estuak
Lehiatuak izan baziren bi finalak, oraindik eta estuagoak izan ziren hirugarren posturako lehiak.
Nesketan, Emerenek eta Eiderrek irabazi zuten, Garbiñe eta Ainararen kontra, bi tantoren aldearekin (22-20). Eta mutiletan, azken tantoan erabaki zen, zein izanen zen hirugarren: 22-21 irabazi zuten Eztebek eta Ganixek, Ruiz eta Zubimendiren kontra.
